Zein da teknologiarenkin eta sare sozialekin daukagun harremana? Zer daukate sare sozialek, pantailara itsatsita gaituztela? Eguneko zenbat ordu ebasten dizkigute? Pantailekin daukagun harremanaren inguruan hausnartu du Julen Linazasorok argitaratu berri duen Sísifo y las redes sociales (Sisifo eta sare sozialak) saiakeran.
Hezkuntza digitaleko adituaren arabera, pantailekiko daukagun mendekotasun arazoa "normalizatu egin dugu", larritasunari erreparatu gabe. Horretara begira jarri da liburuan ere. "Liburu honekin, asmoa da irakurleak hausnarketa bat egitea, alde batetik: zer nolako harremana dut sare sozialekin? Eragina dauka nire bizitzan?". Ikerketa desberdinak erabiliz, sare sozialen negozio eredua aztertu du Linazasorok, eta erabiltzaileen osasunean dituen ondorioetan erreparatu du.
Sare sozialek "bere lana oso ongi" egiten dutela azpimarratu du, algoritmoek erabakitzen dituzten edukien bitartez mendekotasuna eraginez. Hala, gure arreta mantentzea lortzen duten edukiak dira sare sozialak elikatzen dizutenak, eta nagusiki lau direla adierazi du adituak: "Emozio negatiboak sortzen dizkiguten edukiak, desinformazioa, eduki bortitzak eta sexua".
Guzti horren ondorioz, "Platonen haitzuloan bezala, mundua desitxuratua ikusten dugu sareen bitartez". Hala, nerabeek eta gazteek egiten duten erabileraren inguruan hausnarketarako tartea ere eskaintzen du liburuak.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!