Nafarroako Gobernuak hondakinak nola bereizten diren aztertzen duen ikerketa lanaren emaitzak plazaratu ditu. Pertsona bakoitzak 413 kilo zabor sortu dugu 2024an, aurreko urtean baino %0,8 gehiago. Hala ere, gero eta gehiago bereizten dugula nabarmendu du Jose Mari Aierdi kontseilariak eta erdia baino gehiagora iritsi garela diote datuek: %53.
Datuak "onak"· direla nabarmendu dute Nafarroako Gobernutik, kontuan hartuta jarritako zenbait erronka betetzen ari direla, baina hobera egin behar dela ere argi dute. Hartara, uste dute heldu den urtean ateak zabalduko dituen Inmarkoaingo hondakinen tratamendurako zentroak datuak hobetu eginen dituela. Izan ere, egun, errefusa izeneko edukiontzira botatzen den %47 zabortegira iristen da eta horrek hobetzeko beharra duela iruditzen zaie.
Trantsizio Ekologikorako Ministerioak egindako ikerketa lanaren datuak dira aztertutakoak. Espainiako erkidegoekin alderatuta, Nafarroak du daturik onena hondakinen bereizketari dagokionez, lehena baita ere materialak berrerabiltzeko prestatzeari dagokionez eta hamargarren hondakindegira bideratzen den zaborrari dagokionez. Azken honetan da hobetu beharrekoen ataletako bat.
Datuak mahai gainean izanda, Nafarroako Ingurumen Kudeaketako teknikariarekin hitz egin du Euskalerria Irratiak. Uxue Iragi teknikariari iruditzen zaio bereizketa ongi egiten ari direla herritarrak eta erronka nagusia zabor gutxiago sortzean datzala. Nafarroako Ingurumen Kudeaketako teknikariarekin egindako elkarrizketa argazkian klik eginda entzun daiteke.
Erantzuteko, izena emanda egon behar duzu eta horretarako baimenak eduki behar dituzu. Sartu komunitatera!