Sexu-kontsultategiaren ateak zabaldu zituenetik profil askotariko bezeroak igaro dira Itsaso Bakedanorenetik, nahiz eta 25-40 urte bitartekoak nabarmentzen diren. Sexologoak kontatu digunez sexu heziketari dagokionez egon den hutsunea nabarmena da belaunaldi honetako helduengan. "Sexu-heziketari dagokoinez, analfabetoak gara".
Hartara, Udako Euskal Unibertsitatean Sexu-hezkuntza ikasgeletatik haratago ikastaroa emanen du Bakedanok. Online ikastaroa izanen da, "modu dinamiko eta arinean" sexologiari buruzko kontzeptuetan murgilduko dena. Martxoaren 11tik apirilaren 8ra bitartean emanen da ikastaroa, eta izen-ematea zabalik dago jada UEU-ren webgunean.
Adituak dioenez, sexu-hezkuntza beharrezkoa da bizitzako etapa guztietan baina, batez ere, haurtzaroan, nerabezaroan eta gaztaroan. Horregatik sexu-hezkuntza egin dezaketen profesionalei formatzea helburu du ikastaro honek, baita familia, guraso, hezitzaile edota beste profesional batzuei ere. Haur eta gazteentzako erreferenteak diren bidelagunei pista metodologikoak ematea, alegia.
