Alde handia dago udalerriek dituzten ezaugarrien artean baita etxebizitzari dagokionez ere. Ez du zerikustekorik Berriozarrrek duen egoera edo Zizur Nagusiak duena. Lehenengoan, bizilagunen errentari erreparatuta errenta txikienen artean daude bizilagunak eta etxebizitza askoz gehiago eraikitzeko ezintasuna du herriak azalerari dagokionez oso mugatua daudelako. Bigarrengoan, errenta maila altua dute bizilagunek, baina sarbidea ez da erraza eta gazteen artean ezintasuna nabaria da gurasoenetik alde egiteko, adibidez. Eguesibarren ezaugarri desberdinetako errealitateak daude eta horietara egokitzeko beharra ikusten du Xuriñe Peñas alkateak.
Berriozarko, Zizur Nagusiko eta Eguesibarko alkateak bat etorri dira hausnarketa batean: etxebizitzaren arazoari irtenbide ematen hastea ezinbestekoa dela. Hartara, Iker Mariezkurrenak "begi onez" jaso du Berriozar tentsio handiko eremu izendatzearena aukera emanen duelakoan "inguruko herrietara bizitzera doazen gazteak eta gazteak ez direnak" herrian geldi daitezen. Zizur Nagusiaren kasuan ere kezka sortzen du etxebizitzaren sarbide ezak eta "aukerak zabaltzeko" balio dezakeela iruditzen zaio Jon Gondan alkateari. Eguesibarren kasuan, herri desberdinek duten egoera aztertu eta dagokion irtenbidea ematen ahalegindu beharko litzatekeela iruditzen zaio Xuiriñe Peñasi. "Inor kaltetuko ez duen proiektua jarri beharko litzateke mahai gainean. Izan ere, alokairuan etxebizitza duen norbanako asko bizi da Sarrigurenen eta Alfarok planteatutakoak agian ez lieke mesederik eginen", esan du Peñasek. Dena dela, planteatutakoa ongi aztertu beharko dela gaineratu du.
