15 urte igaro dira Arima Sutan talde iruindarra eszenatokietan azkeneko aldiz ikusi genuenetik. 2009an izan zen hori. Orain, Oro ez da urre disko berriarekin itzuli da Iker Ziak, Eneko Zabalzak, Arkaitz Ezkaik eta Alex Rosek osatzen duten taldea.
Ziak berak azpimarratu bezala, alta, Arima Sutanena ez da berez itzulera bat izan, "azaleratze berri" bat baizik, izan ere taldea ez da inoiz desagertu. Itxurakeriaren, zentzu bikoitzez eta noraezean ibiltzearen inguruan hitz egiten duten zazpi kantu bildu dituzte disko berrian, metal gogorraren eta doinu melodikoagoaren artean mugitzen den soinuaz.
Disko osoa entzungai dago plataforma digitaletan eta laster emanen du taldeak hurrengo kontzertuen berri.
