Zizurko Zendeako Udalean, lehengo lepotik burua. Entzungor egin dio Nafarroako Auzitegi Administratiboari (NAA) eta aurtengo plantilla organikoan ez da euskararen zantzurik ere agertzen: 12 lanpostu dira eta ez dago bakar bat elebidunik eta meritu gisa baloratzeko ere ez da euskara aipatzen.
2016an, Nafarroako Administrazio Auzitegiak Zizur Zendeako Udalaren plantilla organikoa baliogabetu zuen, ez zuelako euskarazko lanposturik aurreikusten. Ebazpen hartan, bereziki aipatu zuen Eskualdeetako eta Eremu Urriko Hizkuntzen Europako Gutuna. Ia 8 urteren ondoren, Zizurko Zendeako plantilla organikoak berdin jarraitzen du. Hala uztailaren 22an argitaratutako Nafarroako Aldizkari Ofizialean zehazten den moduan, aurtengo plantilla 12 lanpostuk osatuko dute eta horien artean bakar bat ere ez da izanen elebiduna. Euskara ere ez da meritu gisa aipatzen lanpostu horietan.
Zizurko Zendeako Erreniega Taldeak helegitea jarri eta irabazi zuen baina, argi dagoenez, aurtengo plantilla organikoak ez du ebazpen horren betearazpena jasotzen. Erreniega Taldeak adierazi du "lotsagarria" dela Udalaren jarrera.
