Greba eguna dute gaur Nafarroako zahar etxeetako langileek. Protestan ari dira aspalditik. Lan baldintza hobeak exijitzen dituzte eta hori ziurtatuko dien hitzarmena nahi dute. 2021ean eseri ziren lehenbizikoz sindikatuetako ordezkariak patronalekin, baina hiru urteren ondoren hitzarmenik ez dute eta negoziazioa etenda dagoela salatu du ELA sindikatuko erresidentzietako koordinatzaile Izai Bujandak: "Blokeaturik dute negoziazioa eta ez dute datarik aurreikusita berriz ere eseri eta eztabaidari eusteko". Hogei egunez egin dituzte lanuzteak. Mobilizazioak ere bai: "4.500 langile inguru aritzen dira Nafarroako 70 zahar etxeetan. Gehienak, pribatuak edo kontzertatuak dira, bi baino ez publikoak. Emakumeak dira gehien gehienak eta lan baldintza prekarioekin ari dira jardunean", azaldu du Bujandak. Hitzarmen propio batek ekarriko lieke egoerari buelta eman ahal izatea ELA sindikatuaren aburuz. Gaur, Iruñeko Vinculo plazatik 11:15ean manifestazioa eginen dute. Euskalerria Irratian Izai Bujandari egindako elkarrizketa argazkian klik eginda entzun daiteke.
