Euskal Barrok Ensemble proiektuaren lanak zein aurrerantzean suerta daitezkeen bestelako egitasmo propioak argitara emateko xedearekin, taldeko kide diren Miren Zeberiok eta Enrike Solinisek Erlea argitaletxea sortu dute berriki.
Erlea argitaletxeak lehen fruituak ondu ditu dagoeneko. Euskelelea egitasmoa haur eta familiei zuzendutako ipuin musikatua da, non musika eta kontakizuna uztartzen diren. Jatorrizko ideia Solinisi otu zitzaion Portugalera egindako bidaia baten ondotik. Halaxe azaldu digu Zeberiok berak: "Jakin zuenez, duela 500 urte, bizkaitarrak, biscainho-ak, Braga-ko katedrala eraikitzera joan zirenean hara eraman zuten beraiekin gitarro edo gitarriko instrumentua, eta handik mundu zabalera hedatu zen itsasoz".