Ixil, kurrilo, arraroa da Silke, Uxue Juarez idazle iruindarrak idatzi eta Araiz Mesanza gasteiztarrak ilustratu duen azken album ilustratuko protagonista. Silkeren jauregia-n, Juarezek komunikatzeko arazoak dituen pertsonaia bat sortu du, inguruarekin deseroso sentitzen dena, talde presioa sentitzen duena. Animaliekin eta naturan erosoago sentitzen baita Silke, bere ikaskideekin baino. Zailtasunak zailtasun, besteenganako bidea irekitzeko modua ere aurkituko du protagonistak.
Liburu honetako hitzek eta irudiek bat egiten dute irakurlea eskutik heldu eta ibilaldi liluragarri batetan laguntzeko, elurra mara-mara ari denean sortzen den erritmoari jarraika.
