Orain artean eman ez den testuinguru batean aldarrikatuko ditu Sare Herritarrak euskal presoen eskubideak, larunbatean. Etxera bidea gertu izanen du lelo manifestazioetan, aurrekoetan ez bezala, badirudi-eta urruntzearen amaiera dagoela. Atari horretan, atzera begira jarri da Mikel Mundiñano: “Urruntze politikak sufrimendu asko egin du”.
Sareren aldarrikapena ez da, ordea, urruntze politikara mugatzen; eta badituzte kezkarako neurri gehiago. Gradu progresioen urratzeak salatu ditu Mundiñanok: “Oztopoak nabarmenak dira, presoak etxerako bidea egin ahal izateko. Baldintzak betetzen dituzte, baina salbuespen egoeran oztopoak dituzte”.
Ikur berri batekin eginen da larunbateko mobilizazioa. Maparik eta Euskal presoak Euskal Herrira lelorik ez duen ikurra aurkeztu du Sarek Etxerat elkartearekin batera. Bi gezi eta hitz bat ditu irudiak: etxera.