Osasuna lehena da; ez, sailkapenean, baizik eta memoria historikoan. Lehena, euskal taldeen artean, baita Ligako guztien artean ere, errepresio frankista pairatu zuten fundatzaileei, zuzendaritzako kideei eta jokalariei omenaldia egiten. Orain arte bazterturik izan dira, eta horregatik barkamena eskatu die biktimen senideei Osasunaren egungo presidente Luis Sabalzak. Sabalzaren bide beretik jo dute egungo kapitain Oier Sanjurjok eta Ana Ollo Herritarrekiko harremanetarako Nafarroako Gobernuko kontseilariak.
Senideek eskerrak eman dizkiete Osasunari, Nafarroako Gobernuari, eta, batez ere, fusilaturiko haien senideen historia berreskuratu duten Osasunaren Memoria elkarteko kide Mikel Huarteri.
Ramon Bengarai Osasunako presidentea izan zen, baita Izquierda Republicanako burua ere eta Paristik Iruñera etorri den haren biloba Maite guztiz hunkiturik mintzatu da. Bengarai Iruñeko Orfeoiaren burua ere izan zen. Eta Orfeoiak jarri dio musika gaurko ekitaldiari. Errepresaliatuen senideei hainbat oroigarri eman dizkiete. Tartean, 36ko futbol baloien erreplikak.
Osasunaren Memoria elkartearen sortzaile, Rojos liburuaren egile eta Ramon Bengarairen biografiaren bultzatzaile Mikel Huartek oso pozik azaldu da gaurko omenaldiarekin.Baina gaineratu du, futbolaren munduan, egiazko omenaldia beste bat izanen litzatekeela: ohorezko sakea.