Ezinbesteko lekualdaketengatik bakarrik sartu edo atera ahal izango dira herritarrak Azkoienetik. Zehazki, baimenduta dago herrian sartzeko edo irteteko mugikortasuna, laneko, osasuneko, hezkuntzako, ohiko bizilekura itzultzeko, pertsona ahulei arreta emateko eta ezinbesteko beste arrazoi batzuengatik.
Nafarroako Gobernuak Azkoiengo Udalarekin elkarlanean hartu du erabakia, 100.000 biztanleko 1.700 kutsatze tasa izan ostean.
Konfinamenduaz gain, beste neurri murriztaile batzuk ere aplikatzen dira, eremu publikoetan —ostalaritza, merkataritza, kirola, kultura— eta pribatuetan ordutegietan, edukieretan eta taldeko pertsona kopuruan eragina dutenak.
Zehazki, ostalaritza establezimenduak 22:00etarako itxi beharko dira % 50eko edukierarekin (barnealdean eta terrazetan), eta 6 pertsonatik beherako taldeak dituzten mahaietan bakarrik erabili ahal izango dira. Edukiera muga hori bera izango da merkataritzarako, azoka txikietarako eta abarretarako, bai eta beste gizarte ekitaldi batzuetarako ere.
Kirol eta kultura instalazioak eta parke publikoak ere itxi dituzte; hezkuntza arloan, berriz, dagokion protokoloak agintzen du. Espazio soziosanitarioa jada murrizketak aplikatzen ari zen egoitzen barruan kutsatzea saihesteko.
Jarduerak, hasiera batean, astebeteko iraupena izango du, eta luzatu ahal izango da, egoera epidemiologikoa hobera aldatzen ez bada.