Ikasturtea hasi zenetik, gero eta adin txikiko ikasle gehiago daude konfinaturik, haien guraso edo tutoreen arreta behar dutenak, baina egungo araudiak ez du hori posible egiten duen neurririk ezartzen, eta adingabe horien arduradunek ez dute lanera ez joateko baimenik.
Egoera horren aurrean, LAB, ELA, UGT, CCOO eta Afapna sindikatuek Nafarroko Gobernuari eskatu diote 14 urte baino gutxiagoko haurrak ardurapean duen pertsonentzako baimena ezar dezala.
Azpimarratu dute ez dela nahikoa oporrak edo lizentziak ematea, eta ezinbestekoa dela pertsona horiek nahitaezko betebeharragatiko baimena izatea.
Azaldu dutenez, gaia mahai sektorialera eraman izan dute aurretik, eta orain arte ez dute erantzunik jaso. Baina ostegunean mahai berri bat izango dute, eta han egingo dute eskaera berriro ere. Egindako elkarretaratzearekin gobernua presionatu nahi izan dute, beraz, eskaerari erantzun diezaion.