Nafarroako produktu ekologikoen azokarik handiena apirilean egitekoa zen, baina atzeratu egin behar izan zuten, eta, azkenean, sektoreak bere ekoizpenak eta lana ezagutzera emateko erakusleihoa izan du asteburu honetan, Iruñeko Autobus Geltoki Zaharreko nasetan.
Azoka hau funtsezkoa da sektore ekologikoa ezagutarazteko, tokiko ekoizleei bultzada emateko eta saltoki txikiekin eta herritarrekin loturak sendotzeko. “Halako proiektuak garrantzitsuak dira euren kalitatezko produktuekin herriak bizirik mantentzen laguntzen duten ekoizleak ezagutzera emateko. Krisialdian argi geratu den moduan, nekazaritzako elikagaien sektorea funtsezkoa da Nafarroarentzat”, azpimarratu zuen Itziar Gomez Landa Garapeneko eta Ingurumeneko kontseilariak azokaren aurkezpenean.
30 postu eta jarduera baino gehiagorekin; tokiko ekoizpen ekologikoaren topagunea eta sustatzeko espazioa izan da azoka hiru egunez, antolatzaileen esanetan. Pozik azaldu dira herritarren erantzunarekin, eta eskerrak eman dizkiete gerturatu diren guztiei.