‘Sara’ (2017) eta ‘Kinito egunak’ (2018) lanen ondoren ‘Gezurren habia’ (Elkar) argitaratu du Jabi Elortzak. Gazteak izaten ditu protagonista beti, haiek gerturatu nahi baititu literaturara. Istorio sinesgarriak sortzen ditu horretarako, gertukoak zaizkien pertsonaia eta arazoekin. Bilbon kokatu du trama, eta Ainhoa, Saioa ahizpa eta Ane ezagutuko ditugu.
Asteburu bateko goizaldean, alaba nerabea etxean agertzen ez dela-eta, Ertzaintzari deitu diote gurasoek. Agente pare bat ohikoa dirudien kasua ikertzen hasiko da. Alabaina, galdeketetan sakontzen duten neurrian mataza gero eta korapilatuago ageri da; orduek aurrera egin ahala gezurra gezurraren gain pilatzen dela sentituko dute ertzainek, eta ez dagoela familia horretan kiderik esaten duena sinetsiko diotenik.
