Munduko laborategi asko ari dira helburu horren atzetik, lehia bizian. Baina zientzialarien eta enpresa eta politikarien helburuak ez datoz bat. Ikerlarien artean elkarlanerako joera inoiz baino nabariagoa bada ere, errealitatean hori ez da beti posible izaten, zientzialari gazteak azaldu digun bezala.
Koronabirusaren pandemia honetan argi gelditu da ikerkuntzarako dirua oso beharrezkoa dela. Nerea Zabaletak dioen bezala, SARS-1a Asian eta MERSa Ekialde Ertainean azaldu zirenean gehiago ikertu izan bagenu, gaur egun egoera hobean egonen ginateke.
Baina pandemia honetan zabaldu den beste birus moduko bat desinformazioarena izan da. Zientzia argudio guztiak hankapean hartuta Donald Trumpek eta beste politikari batzuk esandakoen aurrean zer sentitzen duen galdetu diogu Nerea Zabaletari eta errabia eta pena sentitzen duela esan digu.
