“Azal dezatela zer gertatu den eta zer gertatzen ari den Nafarroako zahar etxeetan”

Nafarroako pentsiodunen lau elkarte kalera atera ziren astelehenean, gardentasuna eskatzera pandemian zahar egoitzetan gertatu dena azaltzeko orduan. Pentsiodunak Martxan eta Oneka taldeetako Javier Lareki eta Ana Saroberekin mintzatu gara Metropoli Foralean.

Datuek erakutsi dute Nafarroan koronabirusarekin izandako heriotzen %84 adinekoen egoitzetan izan direla, beste erkidego batzuetan baino nabarmen gehiago. Hori dela eta, pentsiodunen taldeek azalpenak eskatu dizkiote Nafarroako Gobernuari. 

Premiazkotzat jotzen dute gobernuak zahar egoitzetan esku-hartzea eta egoera hobetzeko neurriak hartzea. Egoitzak publifika ditzatela eskatzen dute, nazioarteko inbertsore handiek ez dezaten eskua sartu; eta inbertsioak handitu ditzatela, egoitza horietan dauden pertsonen eskubideak bermatze aldera; pertsona produktiboak izan ez arren, eskubide guztiak dituzten pertsonak izaten jarraitzen dutelako.