Osasun Departamentuak koronabirusa dela eta Nafarroan sor daitezkeen kasu berriak atzemateko estrategia indartzen jarraitzen du. Hala, horiek dituzten gertuko kontaktuei (familian, gizartean zein lanean) jarraipena egingo die. Zentzu horretan, kasu positiboei aurreneko 24 orduetan PCR proba egitearekin batera, orain arte egin den moduan, harreman estuko kontaktuen identifiazioa eta jarraipena indartuko da, haiei ere proba berdina eginez. Atzo, osasun zerbitzu publikoan 1.300 PCR gauzatu ziren.
Bestalde, Osasun Ministerioarekin koordinatuta, birdefinitu egin da koronabirus bidezko infekzio-kasu susmagarriaren kontzeptua, pandemiaren bilakaeran ezagutu diren sintoma berriak barne hartzeko. Zehazki, sukarra, eztula edo aire-faltaren sentsazioa eragiten duen arnas infekzioaren koadro klinikoari beste sintoma atipiko batzuk gehitzen zaizkio, bat-bateko agerpenak definitzen dituenak, hala nola eztarriko mina, gustuaren edo usaimenaren zentzua galtzea, muskuluetako mina, beherakoa, toraxeko mina edo zefalea.
