ELAk bat egin du ‘Euskara, eskubidea’ mobilizazioarekin

Iruñeko Golem zinemetatik abiatuko da manifestazioa, arratsaldeko 17:00etan.

ELAk bat egiten du ‘Euskara, eskubidea; ni más ni menos’ lelopean larunbat honetan egingo den manifestazioekin. Mobilizazioa Iruñeko Golem zinemetatik abiatuko da arratsaldeko 17:00etan, eta haren aldarrikapenen artean, hauek daude: “Euskaraz bizi eta ikasi nahi dugun gurasoak eta ikasleak gara: Iruñekoak, Mendigorrikoak, hangoak eta hemengoak. Euskaraz ikasi nahi eta horretarako aukerarik ez digute ematen: Iruñeko haur eskoletan, Mendigorriko ikastetxe publikoan, Nafarroako Unibertsitate Publikoan… Nafarroa osoan eta irakaskuntza maila guztietan euskaraz ikasteko trabak izaten jarraitzen dugu gaur gaurkoz. Zoritxarrez, hezkuntza eremutik gaindi ere euskarafobiak aurrera darrai: hedabideak direla, pailazoak direla… Ez gaude prest gure eskubideetan atzera egiteko. Euskara eskubidea delako, ni más ni menos”.