Testa Residencial funts inbertitzaileak erosi dituen etxebizitzetan bizi diren familiak "etxebizitzetan jarraitu ahal izateko inolako bermerik" gabe geratu direla salatu du ELA sindikatuak. Nafarroako etxebizitza politikaren "porrotaren" ondorioa da, sindikatuaren ustez: "Erakusten du etxebizitza ez dela eskubide bat, negozioa baizik".
"Prezioa 650 euroraino igotzeko Nafarroako Gobernuaren eta funts-putrearen arteko akordioa, ez da inolako konponbidea arazo horri aurre egiteko; izan ere, familia horietako askok ezingo dute prezio hori ordaindu", ohartarazi du. Soldata-arrakala eta pentsio-arrakala direla eta, neurri horrek genero-inpaktu "izugarria" izanen duela gaineratu dute.
Alokairuko etxebizitza babestuen parke publiko bat galdegin du ELAk, "etxebizitza duin eta egoki baterako sarbidea bermatzeko neurri gisa".