Nafarroako Gobernua eta Eusko Jaurlaritza Gabonen ondoren bilduko dira Abiadura Handiko Trenaren (AHT) proiektuari ekiteko. Hala iragarri du Maria Txibite lehendakariak, Euroeskualdearen bileraren osteko agerraldian. "Azpiegiturek kezkatzen gaituzte. Gabonen ostean, Eusko Jaurlaritzarekin bilduko gara gai honi eta beste batzuei buruz hitz egiteko ", azpimarratu du Txibitek.
Nolanahi ere, foru lehendakariak Aragoiko proiektuaren egoerak ere kezkatzen duela gaineratu du. "Ez dugu ezer egiten Zaragozatik datorren trazatua falta badugu". Urkullu lehendakariak nabarmendu du EAEk "Euskal Y-aren gauzatze guztia arintzea" aldarrikatzen duela, eta gogorarazi du bere gobernuak eta Nafarroakoak "datozen hilabeteetan komunikazio eta garraio arloan partekatutako proiektuak aztertzeko" esertzeko konpromisoa dutela.