Ekitaldi politiko nazionala eginen du EH Bilduk Iruñean urriaren 12an

Euskalerria Irratia 2019ko ira. 30a, 08:04

Bagoaz! Lelopean, Estatuan bizi den ezegonkortasun eta egiturazko krisiaren aurrean Euskal Herriarendako burujabetza aldarrikatzeko eguna izanen dela azpimarratu dute Bakartxo Ruiz, Foru Parlamentariak eta Mertxe Aizpurua, Diputatuak. Manifestazioa Iruñeko karriketan eta ekitaldi politikoa Anaitasuna kiroldegian eginen dituzte.

Urriaren 12a hauteskunde giroan ailegatuko da azaroaren 10aren aurretik. EH Bilduren iritziz, estatuko indar subiranistek Espainiako Gobernua baldintzatzeko aukera moztu nahi izan dute hauteskunde errepikapen honekin. Honen aurrean, independentismoa indartzeko garaia dela uste du Euskal Herria Bilduk. Subiranistek urrats bat aurrera emateko unea da. Iruñean eginen den mobilizazioa euskal independentistek Madrilera eramango duten horma eraikitzeko lehen aukera dela adierazi dute. Subiranistek indartsuagoak diren heinean, okerrago ibiliko direlako autoritarismoaren eta birzentralizazioaren bidean sakontzeko nahi duten Estatuko botere faktikoak eta politikoak. Urriaren 12an, arratsaldeko 17.00 tan abiatuko da manifestazioa Antoniutti parketik eta Anaitasuna kiroldegian bukatuko da. Bertan ekitaldi politikoa eginen du EH Bilduk.

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!