Epaiketan, fiskalak hamabi eta 62 urte bitarteko zigorrak eskatu zituen auzipetu bakoitzarentzat, "lesio eta mehatxu terroristak" egin zituztelakoan. Epaimahaiak autoritatearen aurkako atentatuak, lesioak, desordena publikoak eta mehatxuak egitea leporatu zien, baina terrorismo kalifikazioa baztertuta. Epaileek argudiatu zuten epaiketan ez zela frogatu gazteek "helburu terroristaz" jardun zutenik edo ETArekin loturarik zutenik.
Fiskalak ez du bat egiten epaiarekin: zortzi auzipetuek "aurrez prestatutako erasoa" egin zuten bi guardia zibilen eta haien bikotekideen aurka, eta "helburu argia" zuten: "Erakustea Altsasun pertsona zehatz batzuen pentsamendu bakar eta baztertzaileak agintzen duela". Helegitea aurkezteko idatzian, fiskalak erantsi du pertsona zehatz horiek "bahituta eta beldurtuta" dutela "haien modura pentsatzen ez duten biztanleen parte bat", eta 2016ko urrian gertatutakoa "abisu bat" izan zela "gainerako biztanleentzat".
Iruñekoa ere "terrorismoa"
Jose Peralsek era berean, helegitea jarri du Iruñean iazko martxoan izandako istiluen harira auzipetutako lau gazteen aurkako epaiaren kontra ere. Auzitegi Nazionalak bina urteko zigorrak ezarri zizkien, baina fiskalak eskatu du auzi hura ere terrorismo delitu gisa zigortzeko. Zazpina urteko zigorra eskatu du laurentzat.
