Euskararen alde egindako lanarengatik, Sagrario Aleman izan daiteke Nafarroako Vianako Printzea saria jasoko duena, hautagai gisa proposatu baitu Nafarroako Kultura Kontseiluak.
Etxalekun jaioa, farmazian lizentziatu zen eta euskararen sustapenean aritu izan da lanean urteetan. 1981an hasi zen Arturo Kanpion euskaltegian eta 1982tik zuzentzen dihardu. 2006an, euskaltzain urgazle izendatu zuen Euskaltzaindiak eta euskaltzain oso, 2007an.
Euskararen aldeko ekintzaile porrokatua, Jakin, Bat eta Argia aldizkarietan artikuluak argitaratu izan ditu eta Euskalerria Irratiko bultzatzailea izan da.
