Hitzarmena ostiralean sinatu zuten Ana Ollo Herritarrekiko eta Erakundeekiko Harremanetako kontseilariak eta Topaguneko lehendakari Oskar Zapatak. Nafarroako Gobernuak 100.000 euroko diru-laguntza emango dio “Euskara 365” programari, halako moduz non Euskaraldia ekimena Nafarroan ere gauzatzeko modua egongo den. Aipatzekoa da Nafarroako 2018ko Aurrekontu Orokorretan ekimen honetarako partida bat jaso zela.
Horrela, akordio hau sinatzean, Nafarroako Gobernua, Euskarabidearen bidez, ekimenaren koordinazio orokorra ari da laguntzen honako arlo hauetan: diseinua, dinamizazioa, formazioa, komunikazioa eta baliabideen egokitzapena eta kudeaketa, gerora tokian tokiko ezarpena ahalbidetuko dutenak.
Euskaraldia Topagunearen urte honetarako egitasmo nagusietako bat da. Euskararen erabilera aktibatzeko urte bateko programazioa da hiztunei zein, nahiz eta ez hitz egin, ulertzen dutenei zuzendurik eta ekimenari atxikitzen diren herri guztietan eginen da. Dinamika 11 egun euskaraz bizitzeko gonbitearekin borobilduko da.
Horrelako ekimenen bidez, Nafarroako Gobernuak 2017ko urtarrilaren 25ean onartu zuen Euskararen I. Plan Estrategikoan ezartzen diren helburuak bete nahi ditu. Hain zuzen ere, lehenengo ardatzean honako helburu hau aipatzen da: euskararen erabilera igotzea, hiztunek gizarte arlo guztietan erabil dezatela erraztuz eta euskararen erabilera errazagoa eginez.
Aurkezpen Kondestable Jauregian
Euskaraldia: 11 egun euskaraz ekimenaren aurkezpena Nafarroan datorren martxoaren 14an, asteazkenarekin, arratsaldeko 17:30ean izanen da Iruñeko Kondestable Jauregian. Sarrera libre izanen da, aforo bete artio. Ekitaldian honako hauek parte hartuko dute: Ana Ollo kontseilaria, Mikel Arregi Euskarabideko zuzendari kudeatzailea, Oskar Zapata Nafarroako Topaguneko arduraduna eta Elena Laka Euskaltzaleen Topaguneako presidentea.
Reyes Illintxeta kazetaria arituko da saioa aurkezten, eta honako hauek ere hizlari ariko dira: Arrate Illaro Euskaltzaleen Topagunea, Kike Amonarriz soziolinguista eta Eneko Gorri BAM dinamika barnetik bizi duen euskaltzalea.
