"Ba al dakizu zenbat planetek osatzen duten eguzki sistema? Zer iruditzen dantza eta abesti baten bitartez ikasten baditugu?". Galdera hori luzatu diete zaleei Ene Kantak taldeko kideek, Astonauta DVD-disko berria promozionatzeko, azken lanak espazioa izanen baitu ardatz.
Azaroaren 9an kaleratuko dute, eta diru bilketa jarri dute martxan, finantziazioa lortu asmotan.
Ohi duten gisan, irabazien erdia euskararen aldeko proiektu bat laguntzeko erabiliko dute: Euskalerria Irratia babestu zuten aurreko lanarekin, eta Berria egunkariarentzat izanen da oraingoan bultzada.
Astonauta elkarlanaren emaitza izan da. Taldeko kideak ez dira bakarrik egon grabatzeko orduan. Hamabost ikastetxeren sostengua izan dute: 60 ikaslek hartu dute parte Ene Kantak-eko abestiak dantzatzen.
