Isabel Elizalde, Nafarroako Landa Garapeneko, Toki Administrazioko eta Ingurumeneko kontseilariaren arabera, zerbitzu juridikoek argi utzi dute errekurtsoak ez lukeela aurrera egiteko aukerarik Auzitegi Nagusiaren epaia oso irmoa delako.
Magnesitas de Navarra enpresak Zilbetiko Antzeri pagadian harrobia zabaltzeko proiektua atzera bota zuen epaitegiak. Enpresak epaiaren aurkako helegitea jarriko zuela jakitera eman zuen eta gaur jakin dugu zein izan den Nafarroako Gobernuaren erabakia.
Gobernuaren zerbitzu juridikoentzat "nabarmena" da proiektu horrek ingurumenean eragingo duen kalteari buruzko informazio ugaria eta gainera horrelako proiektuek Ebroko Ur Konfederazioaren oniritzia behar dute eta honek halakorik ez dauka.
Elizaldek gaineratu du epaiak ez duela zertan etorkizunean natur babes bereziko guneetan proiektuak egiteko aukerari buruz jurisprudentzia ezartzen.
Honekin batera gaurko bileran Gobernak erabaki du eskualde honetan garapen ekonomikoa bultzatzeko neurriak hartzea.