Nafarroako parlamentarien ondarea eta jarduera ekonomikoaren berri publiko egiteko aukera aztertuko dute batzorde txostengile batean. Lehenbizi, Erreglamentu Batzordera joanen da gaia eta hor batzorde berezia osatzea adostuko dute. Bestelako gaiak ere aztertuko lituzkete batzorde txostengile horretan: hizkera ez sexista erabiltzeko beharra, parekidetasuna eta osoko bilkuran parlamentari bakoitzaren hizketaldiak zenbateko iraupena izan beharko lukeen ere aztertuko lukete.
Podemos-Ahal duguk egindako proposamena da parlamentarien ondarea publiko egitearena. Geroa Bairen ustez beharrezkoa da jardun politikoa dutenen jarduera ekonomikoa eta ondarearena kontrolatzea, baina, ez du ezinbestekotzat jotzen herritarren aurrean aurkeztu behar izana, "politikariak bizilagunengandik gehiago hurruntzera eraman dezake ekimen horrek eta txutxu-mutxuetarako baino ez luke balioko", esan du Koldo Martinezek.
UPN eta EH Bildurentzat ez dago inolako eragozpenik publiko egiteko eta PSNri egokia iruditzen zaio. Izquierda-Ezkerrak eta PPk ere ez lukete desegoki ikusiko publikazioa.