Txosten juridiko batek babesa eman dio erabakitzeko eta parte hartzeko eskubideaz osoko bilkura monografikoa egiteari. EH Bilduk egin du proposamena eta data zehaztea baino ez zaio falta. Beste bi osoko bilkura berezi ere eginen dira: enpleguaz bata eta gizarte politikaz bestea.
Azaroan izan daitezke osoko bilkura monografiko horiek. Lehena enpleguari buruzkoa izanen da. Alderdi sozialistak egindako proposamena izanagatik, alderdi horretako eledunak hartuko luke hitza lehenengoz. Hogei minutu lituzke bere azalpenak emateko eta ondoren gainerako alderdietako ordezkariek denbora tarte berera lukete. Guztien parte hartzearen ondoren aukera legoke Gobernuko kide batek hitza hartzeko. Proposamen zehatzak ere aurkeztuko dituzte alderdiek. Horretarako osoko bilkura geldiarazi eginen da eta talde parlamentario bakoitzak gehienez bost proposamen aurkezteko aukera izanen du.
Enplegua sortze aldera alderdiek euren proposamenak defendatzeko aukera izanen dute lehenbizi eta gero bozkatu eginen dituzte.