"Euskal preso eta iheslariak etxera zioen pankarta hamabost urtez jarri dute Tafallan, baita alkatetzan beste indar politiko batzuk zeudenean ere", esan du EH Bilduko egungo alkate Arturo Goldarazenak. "Orain, alkatea EH Bildukoa denean sortzen da arazoa", kritikatu du, eta ziurtatu bere inputazioak ez duela funtsik. Epaileari azaldu dio ez dakiela nork jarri zuen pankarta hori udaletxean, baina defendatu du EH Bilduk "babes garrantzitsua" duela udalean eta hori "errespetatu beharra" dagoela. Fiskalak alkatea salatu du pankartaren leloak "hizkuntzaren erabilera desitxuratuz, ETAko presoen egoera bide gabea dela aditzera eman nahi zuelako".