Zortziak laurden gutxietatik, eta giroa berotzeko, The Broken Brothers Brass Band taldeak Burgoen plazan joko du New Orleanseko musika. Gero, irratiko zuzendari Mikel Bujandak lizentziaren ondorioen berri emanen du, hitzaldi labur baten bidez. Horren ondotik, Demode Quartet-ek ohi duenez euskal kantuen bertsioak abestuko ditu a capela. Jarraian, Euskalerria Irratiko langileek oholtzatik eskertuko dute komunitatearen sostengua. Amaitzeko, Esne Beltzako Xabik eta Pinik haien taldearen hainbat kanta joko dituzte.
Dagoeneko festan parte hartuko dutela iragarri dute Parlamentuko presidente Ainhoa Aznarezek, Gobernuko eledun Ana Ollok, Iruñeko alkate Joseba Asironek, Geroa Baiko Koldo Martinezek eta Maria Solanaz, EH Bilduko Adolfo Araizek eta Bakartxo Ruizek, Aranzadiko Laura Berrok eta Aitor Balbasek. Iruñerriko Mankomunitateko presidente Aritz Aiesak eta Iruñerriko beste zenbait alkatek ere parte hartuko dute festan: Oihaneder Indakoetxea (Barañain), Jon Gondan (Zizur), Txema Nobal (Burlata), Ander Oroz (Antsoain).
Han izanen dira, halaber, Euskarabideako Mikel Arregi, Eusko Jaurlaritzako Hizkuntza Politikako buru Patxi Baztarrika, Kontseiluko Paul Bilbao, Behatokiko Garbiñe Petriati, AEK-ko Asier Biurrun, IKAko Sagrario Aleman, besteak beste.