Asteartean jakinarazi zieten debekatu egin zutela iganderako deitua zegoen manifestazioa. Oroimena eta askatasuna goiburuarekin frankismoan fusilatu zituztenak gogoratzea zen mobilizazio horren xedea. ETAko kide Angel Otaegi, Juan Paredes ‘Txiki’, eta FRAPeko Jose Humberto Baena, Ramon Garcia Sanz eta Jose Luis Sanchez Bravo duela 40 urte hil zituzten.
Carmen Albak Espainiako ordezkariak Nafarroan jarri du debekua. Dio, ETA eta FRAP talde terroristetako kideak omentzea baino ez duela helburu manifestazio horrek:" Manifestazioa eginen balitz, talde terrorista horiek sortutako biktimen eta euren senitartekoen gutxiespena eta iraina izanen litzateke".
Oroimenerako eta askatasunerako eskubidea urratzen duela uste dute antolatzaileek, tartean Ahaztuak taldeak. Helegitea jarri diote Albaren debekuari. Auzitegian eskatu dute "oroimenerako eta askatasunerako" dagoen eskubidea defendatzeko eta debekua bertan behera uzteko.