Geroa Bai, EH Bildu, Podemos eta I-E alderdiek aldez aurretik hitzarmen bat egina zutela gobernu alternatibo bat eratzeko helburuarekin kritikatu du Esparzak:
“UPN ez da errespetatua izan eta hau aldez aurretik egina zegoen” eta EH Bildurekin hitzarmenik ez egiteko erabakia berretsi du: "Gure iritziz, lerro gorriak daude, eta Bildurekin eginiko edozein akordio ez da morala". Barkosi galdegin dio Bilduri eska diezaiola "terrorismoa gaitzesteko eta biktimei barkamena eskatzeko".
Joseba Asiron EH Bilduko Iruñeko alkategaiari babesa emanda, Geroa Baik "lerro gorri" hori gainditu duela uste du Esparzak, eta gaineratu du " bide orria " betetzen ari direla, Asiron Iruñeko alkate eta Barkos Nafarroako Gobernuko presidente izateko bidean.
Halaber, Esparzak kritikatu du Ahal Dugu eta Ezkerra "konplize" gisa erabili dituztela abertzaleek Nafarroa "euskal diputazio bat gehiago" izan dadin. Horren harira, Pablo Iglesias Podemoseko idazkari nagusiari kontuak eskatu dizkio "Batasunako gobernu bat" babesteagatik. Honi gaineratu dio irainak eta gezurrak ugari izan direla kanpaina osoan zehar.
Enrique Maia UPNko Iruñeko zerrendaburua ere gogor mintzatu da: "ETA gaitzesten ez dutenek gobernatuko dute". UPNk EH Bilduren zinegotzi kopurua baino bi bider gehiago dituela nabarmendu du eta Iruñea kudeatzeko "zailtasun handiak" izango direla iragarri du.