Sintonia onean joan da Geroa Bai eta Ahal dugu koalizioen arteko bilera. Ordu eta erdi batzartuta izan dira aldaketaren Gobernua osatzeko lehentasunezkoak liratekeenak adosten. Programa osatzerako unean zenbait arlotan "erraza" izanen da bat egitea Uxue Barkosen ustez: "Gizarte politiketan, gardentasunean eta ustelkeriari aurre egiteko proposamenetan adostasunetara iristeko aukera asko dago". Ahal dugu-ko Laura Perezek programan lehentasunak markatzea eta horiek adostea jo ditu garrantzitsu: "Negoziazio mahaia osatu beharko genuke aldaketaren Gobernua osatzeko prest gaudenak, akordioak erdiesteko".
Heldu den astean hasiko lirateke elkartzen mahai baten inguruan aldaketaren alde leudekeen alderdiak Barkosek aditzera eman duenez: "Programan gehiago sakondu eta akordio zehatzagoetara iristeko lanean ariko gara". Elkarrizketarako mahai horretan PSN ikusten ote duten galdetu diete kazetariek koalizio banatako ordezkariei, Barkosek alderdi sozialista ikusiko luke mahai horren inguruan eta Perezek ez luke baztertuko aukera: "Modu horretan alderdiaren kontraesanak agerian geratuko lirateke", nabarmendu du.
Bere burua Gobernuaren parte ikusten ote duen galdetu diote Perezi: "Gobernuaren parte izatea ez dut alboratzen baina kanpotik babestea ere ez dut baztertzen, garrantzitsuena lehentasunak programan markatzea eta horiek betearazteko lan egitea da".