Aurre-matrikulazio kanpainaren aurkezpenean, Jose Iribas hezkuntza kontseilariak aukeraketa askatasunaren aldeko aldarria egin du. Haatik halaber iragarri du ez duela D eredu publikoa ikastetxe gehiagora eramanen 2015-2016 ikasturtean. Aitzitik, ingelesezko PAI eredua bai, hori zabalduko du, ikasturte berrian 16 ikastetxe berrira iritsiko baita. Egun Nafarroan 218 ikastetxe daude. Horietako 107tan izanen da ingelesezko eredua 2015-2016an. 0-3 urteko zikloan, aurre-matrikulazio epea martxoaren 2tik 17ra izanen da zabalik.
D eredua, eskertuko dizute
Eraman itzazu seme-alabak D eredura, eskertuko dizute eta. Horixe da Nafarroako hainbat udaletako euskara zerbitzuek abian jarri duten kanpainaren mezu nagusia.
Ideia horretatik abiaturik, bideo bikaina egin dute. Bideoaren protagonistak Sadatarrak dira, Albaro eta Oskar anaiak. Txikitan, guraso erdaldunek D eredura eraman zituzten. Albarok dio horri esker baloreetan oinarrituriko kalitatezko heziketa jaso zuela. Oskarrek, bere bizitza pertsonalean zein profesionalean hori giltzarria izan dela. Bion artean, gurasoei festa antolatzen diete, egindakoa eskertzeko. Oskarren kasuan, mutil jatorra eta eskuzabala dela ziurta dezakegu, urtetan kolaboratu baitu Euskalerria Irratiarekin.
Eskerrik asko, euskara teknikariok, bideo ederra egin duzue eta. Honatx kanpainan parte hatru duten udal euskara zerbitzuak: Agoitz, Antsoain, Aranguren Ibarra, Atarrabia, Berriobeiti, Berriozar, Burlata, Eguesibar, Esteribar, Etxauri, Galar Zendea, Gares, Oltza Zendea, Orkoien, Sakanako Mankomunitatea, Uharte eta Zizur Nagusiko Kultur Patronatua.
