Brasilian gertatutakoaren ondorio politikoak edonork atera ditzake; bizpahiru artikulu irakurrita, Twitterreko analista burutsu batzuk jarraitzea eta Brasileko lagun batekin hitz eginda, nahikoa da norberaren iritzia osatzeko. Beraz, eskuin muturreko mehatxua gauzatzen ari dela esan dezakegu, gero eta mezu katastrofistagoak zabaltzen... Ez dakit, ez dut errealitate hura ongi ezagutzen, bizpahiru artikulu irakurri, Twitterreko analista burutsu batzuk jarraitu eta Brasileko lagun batekin hitz egin badut ere...
Dena den, intuizio bat botako dut, baikorregia akaso, inozoa seguru: Washingtoneko Kapitolioan gertatu zen bezala, eskuin muturrak hil ala biziko apostua egin du galdutako boterea berreskuratzeko, eta ezin izan du. Porrot hauek, gainera, euren liderrak jokoz kanpo kokatu dituzte, eta ezker politikoari utzi diote demokrazia defendatzeko gune osoa. Arriskuak hor dirau, jakina, baina apokalipsia deitzea ez zaigu komeni, paralisia ekar dezake, bakarrik.
