Nafarroako Administrazioetan Euskararen Eguna: Lan deialdietan euskara kontuan hartzeko beharra agerian jartzeko

Erabiltzailearen aurpegia
Aukera ona bertan euskararen egoera aztertzeko.
NAFARROAKO ADMINISTRAZIOETAN EUSKARAREN EGUNA: LAN DEIALDIETAN EUSKARA KONTUAN HARTZEKO BEHARRA AGERIAN JARTZEKO


Korrikaren iritsierarekin batera, Nafarroako Administrazioetan Euskararen Eguna antolatu dugu. Aukera ona bertan euskararen egoera aztertzeko. Oraintxe Merezimenduen dekretu-zirriborroa eztabaidan daukagu. Horrekin ia 2017ko egoerara itzuliko ginateke, baina barne-lehiaketetan, eremu mistoan puntuatu beharreko lanpostu kopurua murriztuko litzateke, eta beste gabezia batzuk betikotuko lirateke:

- Eremu “ez euskaldunean” euskara ez da aintzat hartuko, baina ingelesa, alemana etab, bai.

- Oposizioetan euskara ez da baloratuko (azterketa ez baztertzaile batekin egin zitekeen).

- Euskara aintzat hartzen denean (funtsean Foruzaingoan eta Osasunbidean) gutxi baloratuko da eta bere eragina murrizteko beste merituekin batera (merituen puntuen batuketak muga duelako eta, beraz, puntuen mugara beste merituekin ere ia iris daitekeelako).

Are larriagoa dena, epaile euskarafoboei aurre egin gabe segituko dugu, Udalek hizkuntz profilak ezartzeko ahalmena oso murriztuta, eta eremu mistoko Euskararen Ordenantzetan euskarari esleitutako balorazioak deuseztuta.

Nafarroako Gobernuan eta Iruñeko Udalean, irakaskuntzatik kanpo, lanpostu elebidunen kopurua % 3 besterik ez dira. Edo gutxiago.

Eremu “euskalduneko” zerbitzu publiko orokorretan ere, lanpostu elebidunak gaztelerazko elebakarrak baino askoz gutxiago dira.

Bidegabekeria hauek konpontzeko hauxe eskatzen dugu:

1) Lanpostu elebidunen kopurua nabarmen handitzea, irakaskuntzatik kanpo gutxienez kopuru hau izateko: Euskaldun kopuruaren portzentajea + euskaldun pasiboen kopuruaren portzentajearen erdia.

2) Gainontzeko lanpostuetan euskaraz jakitea meritua izatea (jendaurreko lanpostuetan eta eremu euskaldunean gutxienez % 10eko balioaz eta gainontzeko lanpostuetan gutxienez % 5eko balioaz).

2022-05-06.

NAFARROAKO ADMINISTRAZIOETAKO KORRIKA BATZORDEA.