2018-10-25/11-14: ERRIGORAREN KANPAINA BERRIA.
Saski beltza eta saski zuria eska daitezke. 50 euro balio du saski bakoitzak. Etekinetatik % 25 Nafarroako hegoaldeko euskalgintzari emanen diote.
Saskien edukia ezagutzeko eta eskaera egiteko: “https://www.errigora.eus/nafar-hegoaldeko-uzta-euskarari-puzka” eta “https://www.errigora.eus/non-eskatu” webguneetan.
Zer da Errigora?
Errigora Euskal Herria oinarri eta elkarlana lanabes dituen ekimen herritarra da. Nafarroa hegoaldea du ardatz eta “euskara ofiziala ez den zonaldean” eragin nahi du, eremu horretakoak propio diren produktuei Euskal Herrian bidea emanaz, euskaratik, euskararako eta euskaraz.
Norabide horretan, egunetik egunera gero ta zabalagoa den lagunarte batek ematen dio gorputza ekimenari; ilusioz eta anbizioz ari garen herritar, nekazari, euskaltzale, ekoizle eta kontsumitzaileez osatutako sare anitz batek. Gure txikitasunetik elkarlan handi bat gauzatu nahi dugu Nafarroak Euskal Herria behar duelako eta Euskal Herriak Nafarroa behar duelako.
Zeintzuk dira Errigoraren helburuak?
Nafarroa hegoaldeak propio dituen produktuak Euskal Herriko plazan kokatzea, urrunekoen ordez bertokoak kontsumitu ditzagun.
Nafarroa hegoaldean “euskara ofiziala ez den zonaldeko” euskalgintzari bultzada ekonomikoa ematea.
Herrigintza, auzolana, nazio-eraikuntza… “Betiko” lan kolektiboan oinarrituz ekarpentxo bat egitea, lan molde honen beharra eta indarra goraipatuz.
