Irrintzi hau zorion-irrintzia da, eta, bidenabar, zorionak emateko irrintzia ere bai, LABA zabalik baita, non eta hiriburuzagi honen bihotz-bihotzean, Gaztelu plazan, non eta Windsor zaharminduaren eta La Perla are zaharminduagoaren artean, nork eta gazte jendeak zabaldutako txoko ederra, euskaldunon topagune berria.
Txalo-zaparrada gu baino gazteago diren ekintzaile horiei guztiei, auzolanaren bidez egin baitute besteok egiten asmatu ez genuena; mila kilo zorion zuena izan baita ekimena, gurea sustengu xumea.
Eduardo Galeanok poema bat idatzi zuen, nik zuentzat euskaratu dudana:
Gauza ttiki-ttikiak dira.
Ez dute pobrezia desagerrarazten
ez gaituzte azpigarapenetik ateratzen
ez dituzte ekoizpen eta aldaketa-bideak sozializatzen
ez dituzte Ali Babaren kobazuloak desjabetzen.
Baina egia esateko piztu
eta ekintza bilakatzen dituzte.
Azken finean
errealitatean eragin eta aldatzea
pixkatxo bat badarik ere
bada errealitatea
aldatu daitekeela
frogatzeko modu bakarra.
Gora LABA; biba zuek!
