Solstizio on denoi!

Erabiltzailearen aurpegia Iñaki Irisarri 2015ko abe. 23a, 18:33

Neguko solstizioa etorri zaigu, urtero bezala huts egin gabe. Beraz, gure txikian ohartzen ez bagara ere, hasia da argitasuna ilunpea mendean hartzen, eta egunak gero eta luzeagoak izanen dira udako solstizioa heldu bitarte. Argiaren garaipenaren hasiera dugu neguko solstizioa.

 

           

 Nahi nuen halako metafora polit bat hauteskundeetan gertatutakora eraman, baina makina bat buelta emanda ere ez dut biderik aurkitu. Baina garai hits hauetan optimista izatea aukera bat ez baizik eta behar bat denez, azkenean argia sartzeko moduko zirrikitu bat topatu dut. Zer demontre, akabo da kolore bakarreko gobernu inposatzailea, eta akabo da, orobat, panorama politikoaren zuri-beltza. Koloreen aldeko apustua egin du herriak, eta talde guztiek beren nahiei uko egiten ikasi beharko dute gobernatzeko moduko gehiengo bat lortuko bada. Osasungarria da hori, eta benetako demokrazia baten funtsa, akaso atzendu samar badugu ere.

   Inguru hurbilera bildua, ordea, ematen du iluna zabaltzen hasia dela, eta ez egunaren argia. Gogoeta hitza aditu genuen atzo han eta hemen, beti bezala destenore samarrean. Baina sekula ez da berandu hobetzeko, eta badago nahikoa denbora aurretik kontua bideratzeko. Gaitasunik ere ba ote dagoen denborak esan beharko du.

Bitartean, solstizio on denoi!

EUSKALERRIA IRRATIAzale hori:

FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.

Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.

Izan ere, zenbat eta komunitate handiagoa, orduan eta proiektu komunikatibo eraginkorragoa.


Bazkidetu zaitez!