Albion Maltzurra

Erabiltzailearen aurpegia

Pozik eta alai ikusi dut erretratuan; ez da berri-berria argazkia, baina, gaur aireratu dute. Clara Ponsati, Kataluniako Hezkuntza Kontseilari izandakoa, erbestean bizi da, Kataluniako hainbat buruzagi soberanista legez. Eskozian bizi da Ponsati. Pablo Llarena Espainiako Auzitegi Goreneko magistratuak haren estradizioa eskatua zuen. Erresuma Batuak atzera bota du oraingoz magistratuaren eskaria. Pozik da, hartara, Ponsati. Hauteskunde kanpainaren azken txanpan etorri da britainiarren ezezkoa. Katalunia bera ardatz hartua duen kanpainaren azken txanpan. Espainiak bere lurraldeak zelan antolatu ez dakien une batean. Espainiak sekulako indarrez borrokatzen dituenean haren periferiako nazioak.

Lezioa izan da, irakasgaia. Justizia britainiarrak dio “neurrigabea” dela Ponsati sedizioagatik epaitu gura izatea. Neurrigabea ari da bihurtzen, era berean, hauteskunde kanpaina hau, lurraldetasuna aipatzen denean, nazioen nortasuna aipatzen denean. Lezioa, irakasgaia, Albion Maltzurretik heldutakoa. Dena ez da urregorri Britainia Haundian, baina, gaur, ortzadarra ikusi da laino artean.