Bezperetako irudiak dira gaurkoak, oraindik erretratatu ez direnak, baina susmatu egiten dituzunak: udagoienean sartuko gara asteburuan; eta hauteskunde-kanpaina baten barruan sartuko gaituzte berehalakoan.
Udagoiena, udazkena... basoetako kolore erromantikoak, hego-haize eroa, bihar-etziko lehen elur hotzikarak. Hauteskunde-kanpaina... propagandaren kolore laruminak, gezur-haize sargoria, bihar-etziko Espainia itxuragabea.
Baratzetan igarriko da segituan udagoiena: lurrak irauli beharko dituzte nekazariek, neguko uzta amets. Politikariek boto-emaileen gogoak beharko irauli, azaroko paradisu promestuari begira.
Santomasetako ferietan azalduko da gaur iraulitako lurrek emandako uztaren ederra: porrua, aza eta kardabera. Madrilgo Parlamentuko feriak zer uzta ekarriko, ezin jakin... baina, oharkabetuz gero, azak emango dizkigute han, eta porrua sartu...
