Harea, hondarra, ikusten dut argazkietan. Pluralean diot, argazkietan. Harea horia. Hondar horia. Basamortukoa. Ur-bazterretakoa.
Argazki batean, porlanezko petril baten ondoan, hareari begira, soldadua dago: kaskoarekin, arma luzearekin... haren gainetik, helikoptero bi. Mosulgo bataila erretransmititzera doaz munduko kamara guztiak.
Beste argazkian, kalez jantzita, aktoreak eta aktoresak daude: zinema-kamarekin, gidoiekin... haien ondotik, Guardia Zibilaren patruila-ontzi bat. 'Tronu dema' filma grabatzera doaz Barrikako hondartzan.
Gerra basamortuan, Estatu Islamiarraren aurka. Gerra-edo Bizkaiko kostaldean, tronu baten peskizan. Gertatu ohi da fikzioak kentzea indarra eta benetakotasuna errealari, tragikoa izan arren erreala. Munduaren lau bazterretan ikusiko dira filmazio biak: gure kostaldekoa eta Tigris ibai urrunekoa. Telebistan ikusita, zineman ikusita, Tronu demaren itzalean, pobrea irudiko zaigu, akaso, Mosulgo bataila.
