Zuriz jantzita gerritik gora eta handik behera: dotore, garbi, txukun, apain-apain... horrela azaldu da argazkian Jorge Mario Bergoglio, Aita Saindua. Serio. Irmo.
Mikrofonoa eskuan, hegazkineko korridorean zutik, honako hau adierazi berri die Aita Sainduak kazetariei: kondoiak erabiltzea ez da erabat bekatu, baldin eta gaixotasunak saihestu nahi badira. Adierazpen horietan, Aita Sainduak esan du nahiago duela kondoia abortua baino.
Mexikora egindako bisita pastoralaren itzulian egin ditu adierazpen horiek Frantzisko Aita Sainduak. Bai eta hurrengo hauek ere: “Kristau izatea ez da hormak altxatzea, zubiak eraikitzea baino”. Bergogliok kontra egin dio Donald Trump errepublikano estatubatuarrari; hark esan berri du harresi bat eraikiko lukeela Estatu Batuak eta Mexiko artean, emigrazio ilegala gerarazteko.
“Kondoiak bai, harresirik ez...” bada pankarta batean idazteko lelo aproposa.
