Hautagaia ikusi dut egunkariko azala betetzen, pied-noir itxurako batekin ari da kantuan. Eskuetan du gitarra gizaseme beltzak, eta, gibelean, kalean lo egiteko zakua. Hautagaiak txalo-jotzen du, musikari laguntzeko.
Hiriguneko kale batean daude biak, moda-boutique baten kanpoaldean, erakusleihoak duen koxka batean, ondo-ondoan eserita. Biak jeansekin, praka bakeroekin. Jaka arina, markakoa, darama hautagaiak. Aitarik ez duen beroki gorria barrutik eta amarik ez duen anorak urdina haren gainetik, gizaseme beltzak.
Espainiako hauteskunde-kanpaina badoa, eta hautagaiak dena baliatu behar du egunkarian azaltzeko.
Argazki hauetako asko botako dira paperontzira astelehenean. Baten bat zainduko du alderdiak kanpainako artxiboetan, hurrengo baterako-edo.
Baina, gordeko ote du argazkirik hautagaiak berak, markoan jarri eta etxeko egongelan eskegitzeko?
