“Errege hil da, gora Errege!”, hala esan ohi zuten jauntxoek eta gortesauek ondorengotza bermatzeko. Euskadiko PPren kasuan, erregina da joan dena, eta erregea etorri dena.
Ondorengotza bizkor tramitatu bada ere, ikusteko dago ontziaren zurajeak zenbaterainoko kaltea jaso duen. Harkaitz gogorra jo du brankarekin, eta poparaino hedatu da dardara.
Itxaropentsu hartu zuten alderdi eta politikari batzuek Arantza Quirogaren bake eta bizikidetzarako proposamena; baina, antza, haize bortitzegia izan da PPren ontzi jada zartatuarentzat.
Hil ala biziko ziaboga agindu dute Madrildik. Eta hor etorri da agudo asko errekanbioa: Alfonso Alonso. Errege berriarentzat prestatu eta paratu dute ganbera dotorea ontziaren solairu noblean. Hobe luke oihalei sinestea, haizeak ez dira baretu, eta itsasoa marrazoz beteta dago.
