Dinamitazko onddo zuria ikusi dut gaurko argazkian. Hegazkin batek bonba jaurti, hura lehertu, eta eztandak sortzen duen kezko zutabe bihurria ikusten da fotografian. Lautada eder batean hori guztia; eta ez da urrun, etxean baizik. Hegazkinak Bardea bonbardatu du, beste behin ere.
Hori, argazkian. Nafarroako Parlamentuan, aldiz, Bardeako tiro-poligonoa bertan behera uzteko eskakizuna. Eta eskakizunaren aurrean, horra hor alderdien kokapena. Poligonoa deuseztatzearen alde: Ezkerra, Geroa Bai, Bildu eta Ahal Dugu. Poligonoari eustearen alde: PPN, UPN eta PSN... Hori ere, nahikoa argazki.
Beti begitandu zait harrigarri bakea eta gerra nola ulertzen diren kasu batzuetan eta besteetan. Xenpelarren bertsoa etorri zait akordura: “Ez oraindik umildu, elkarrengana bildu, gerra nahi duen guzia, berari kendu bizia”...
Bakea nahi baduzu, presta ezazu hura.
