Egunon.
Printzeen errege, erregeen enperadore... horra hor Jaun Baloi. Paperetan ikusi dut Jaun Baloi: burusoil, mozkote, potin eta potxolo. Baina, bizkorra da, arina. Eta batez ere, aberatsa.
Madrilgo Auzitegi Nazionalak onartu egin du Espainiako Futbol Ligak eskatutakoa, eta bertan behera utzi du Federazioak eta Futbolarien Elkarteak deitutako greba. Asteburuan, futbola izango da. Agintariek hala aginduta.
Kaosa saihesteko hartu ei du erabakia tribunalak. Diru-galera izugarriak eta liga amaitzeko antolaketa-arazo larriak aipatu ditu auzitegiak. Eta hori baino gehiago ere esan du: greba-eskubidea ez dela oinarrizko eskubide bat.
Niri guardia zibilak etorri zaizkit akordura; haiek ere arazoak inoiz, greba egiteko. Auzitegiak auzitegi, eta grebak greba, Benemerita delako hori den bezala, azkenean, militarizatuko ote da burusoil mozkotea, Jaun Baloi?
Barkatu ironia, entzule; gaur zortzira arte.
Jaun Baloi
2015ko mai. 15a, 14:44
EUSKALERRIA IRRATIAzale hori:
FM 98.3ko zein euskalerriairratia.eus webguneko edukiak musu truk entzun, irakur eta ikus ditzakezu.
Zuretzako eskari bat dugu: posible baduzu, lagun gaitzazu gero eta eduki gehiago eta hobeak sortzen, Iruñerriko euskaldun ororen eskura jartzeko.
Izan ere, zenbat eta komunitate handiagoa, orduan eta proiektu komunikatibo eraginkorragoa.
Bazkidetu zaitez!