Neurriz gain eta neurri gabe pagatzen ibilitako jauntxo batzuek betetzen dituzte gaur egunkarietako azalak: izan horiek PPkoak edo Osasunakoak. Baina, aurpegirik ez duten lagun batzuen erretratuek eman didate niri atentzioa.
Euskal Autonomi Erkidegoan bi mila lagun bizi dira kale gorrian, horra datua. Hamar herri handitan egin dute zenbaketa: Bilbo, Donostia, Gasteiz, Barakaldo, Getxo, Portugalete, Santurtzi, Sestao, Laudio eta Irun. Horietan egin da zenbaketa, baina ez da horietara mugatzen larritasuna.
Herri eta hiri horietan, bi mila lagun aurkitu dituzte kale gorrian bizitzen. Horietatik, zubipean bizi dira hirurehun pasa, ez baitute horiek lekurik aterpeetan.
Gizonezkoak dira lautik hiru; eta hamarretik bat, adingabea.
Negu honetan zubipean, urak handi; eta gizakiak txiki.
