Nafarroako erregimenaren indarrak erabakiaren atzean daudela uste du Patxi Zamora Kontuz elkarteko bozeramaileak. Aurreko legegintzaldian, Nafarroan azken urteetan izandako ustelkeria kasu ugari argitara atera zituen Kontuzek. Orain elkarteko bozeramailea lanetik bota dute Guardia Zibilaren erabaki bat tarteko.
Aire laguntzaile gisa egiten zuen lan, eta Guardia Zibilak, hegazkinera igotzea debekatu dio Zamora “ez gai” izendatuz. Ostiral goizean elkarteko kideek eman duten prentsaurrekoan adierazi dute, Guardia Zibilen agintari batek Iberia konpainiari adierazi ziola Zamorak ez zuela bertan egingo lan gehiago. Iberiari ez zaio Guardia Zibilaren “erabakia gustatu”, hala ere, lanetik bota dute Zamora.
Patxi Zamoraren aldeko manifestu bat kaleratuko dutela adierazi dute Kontuz elkarteko kideek; eragile, alderdi eta sindikatuen babesa eskatu dute. Espainiako Barne Ministerioaren aurka salaketa jarriko dutela ere aurreratu dute.
